Projektligji për Pagat rrezikon qëndrueshmërinë buxhetore 

Oda Ekonomike Amerikane kërkon nga Qeveria e Kosovës, të tregohet e kujdesshme në lidhje me nevlet e propozuara të pagave.

Oda Ekonomike Amerikane ka kërkuar nga Qeveria e Kosovës të tregohet e kujdesshme me nivelet e propozuara të pagave në Projektligjin mbi Pagat.

Ky institucion vlerëson se projektligji aktual për paga rrezikon qëndrueshmërinë buxhetore si dhe rrit edhe më shumë hendekun e pagesave ndërmjet sektorit publik dhe atij privat.

“Aprovimi i Projektligjit për Paga në formën aktuale, do të kishte implikime të konsiderueshme dhe do rriste deficitin buxhetor në vend. Rritja e pjesëmarrjes së pagave në buxhetin e vendit do të ndodhte në kurriz të rënies së investimeve kapitale që janë të një rëndësie shumë të madhe në aspekt të fuqizimit së sektorit privat dhe nxitjes së zhvillimit ekonomik. Për më tepër, rritja e deficitit padyshim se do të çonte në rritjen e barrës tatimore për bizneset ekzistuese në vend, duke marrë parasysh nevojën për mbledhjen e më shumë të hyrave”, thuhet ndër të tjera në reagimin e Odës Ekonomike Amerikane.

Krahas ndikimit buxhetor, sipas Odës Ekonomike Amerikane, ky projektligj do të ndikonte negativisht edhe mbi tregun e punës në vend.