Haradinaj reagon ndaj gjuhës fyese ndaj popullit turk

Gjuha fyese dhe deklarimet fyese ndaj popullit turk, kanë bërë që Kryeministri Ramush Haradinaj të reagoj.

Kryeministri i Kosovës, Ramush Haradinaj me anë të një njoftimi ka reaguar ndaj gjuhës dhe deklarimeve fyese ndaj popullit turk.

“Qeveria e Republikës së Kosovës rithekson fuqishëm qëndrimin e saj kundër deklarimeve dhe gjuhës fyese ndaj Republikës së Turqisë dhe popullit turk, nga kushdo qoftë në vendin tonë”, thuhet në reagimin e Haradinajt.

Po ashtu sipas tij, Qeveria gjithashtu dënon fuqishëm çdo akt vandal që përdhosë simbolet nacionale dhe shtetërore të Republikës së Turqisë.

“Qeveria e Kosovës është e përkushtuar në ndërtimin e raporteve të mira me të gjitha vendet e rajonit dhe ka konsideratë të veçantë për bashkëpunimin e mirë me vendet që kanë njohur dhe ndihmuar pavarësinë e Kosovës”, ka shkruar tutje Haradinaj.

Po ashtu Qeveria e Kosovës është e vendosur dhe kërkon nga organet e rendit që të ndërmarrin të gjitha masat ndaj atyre që nuk respektojnë interesat shtetërore të Kosovës dhe ndaj atyre që prishin harmonin dhe bashkëjetesën e qytetarëve të saj, pa marr parasysh përkatësin e tyre etnike.