Turisti zviceran, i mrekulluar nga Shpella e Gadimës

Ai ka fjalë të mira për Kosovën, ku dallon mikpritjen e banorëve të saj, ndërsa Shpella e Gadimës i ka lënë më së shumti përshtypje

Shpella e Gadimës është shpella më e njohur në Kosovë dhe aktualisht është e vetmja e përgatitur për vizitorë në Kosovë.

Pasuri e shpellës, që e bën të veçantë, është prezenca e aragoniteve, të cilat si stoli shpellore janë dukuri të rralla.

Ndër vizitorët e veçantë të kësaj shpelle është edhe qytetari zviceran Rene Alleman, i cili e viziton për herë të parë Kosovën.

“Është hera e parë që vij në Kosovë. Për tri javë sa do ta shëtis Evropën, vendi që kam dashur ta vizitoj gjithnjë është Kosova. Jam shumë i lumtur që jam këtu”, shprehet turisti nga Zvicra për RTV Dukagjini.

Ai ka fjalë të mira për Kosovën, ku dallon mikpritjen e banorëve të saj, ndërsa Shpella e Gadimës i ka lënë më së shumti përshtypje, përcjell albinfo.ch.

“Kosova është vend i mrekullueshëm, sidomos mikpritja. Ajo që më ka lënë përshtypje është kjo shpellë. Është e bukur dhe interesante, por edhe e mistershme”, shprehet ndër të tjera zvicerani Rene Alleman, përcjell Telegrafi.

Drejtoresha Adriana Pllana thotë se vitin e kaluar shpellën e kanë vizituar 40 mijë vizitorë.

“Para tri viteve kemi pasur rreth 25 mijë vizitorë, ky numër gradualisht është rritur, ndërsa vitin e kaluar kemi pasur diku 40 mijë vizitorë nga Kosova e diaspora, mirëpo këtë vit vërehet një rritje e numrit të vizitorëve të huaj”, shprehet Adriana Pllana, drejtoreshë e “Shpellës së Gadimës”.