Shqiptarët korrektë me lëvizjen e lirë në zonën Shengen

Dinamika e lëvizjes nga Shqipëria është mbi 11. 569. 303 herë që kanë dalë dhe kanë hyrë në Shqipëri, nga dita e liberalizimit të vizave deri në fund të muajit nëntor

Shqiptarët i kanë respektuar rregullat e lëvizjes së lirë në zonën Shengen dhe kjo është një histori suksesi. Kështu ka deklaruar ministri i Brendshëm i Shqipërisë, Flamur Noka duke raportuar për procesin e liberalizimit të vizave në Komisionin parlamentar të Integrimit.

“Nga dita e fillimit të lëvizjes pa viza, deri më sot rezulton se mbi 1. 895. 100 shtetas shqiptarë kanë përdorur pasaporta biometrike për të qarkulluar jashtë vendit. Kurse dinamika e lëvizjes nga Republika e Shqipërisë është mbi 11. 569. 303 herë që kanë dalë dhe kanë hyrë në Shqipëri, nga dita e liberalizimit të vizave deri në fund të muajit nëntor”, vlerësoi Noka.

Por, sipas tij, pavarësisht masave të marra nuk janë shmangur rastet e azilkërkuesve.

“Qeveria është vlerësuar nga BE-ja për masat e marra por pavarësisht masave nuk janë shmangur raste të kërkesave për azil. Problemin e azilkërkuesve e kemi kapur që në gjenezë. Në total, numri shtetasve shqiptarë që kanë kërkuar azil në vendet e Bashkimit Europian deri në fund të muajit nëntor të vitit në vijim është 4213”, deklaroi Noka.

Gjithashtu Ministri i Brendshëmi Shqipërisë ka deklaruar se do të ketë konsultime me opozitën për çështjen e dhënies së shtetësisë me origjinë etnike shqiptare.