Edhe 3 futbollistë shqiptarë nga Maqedonia vishen kuqezi

Besir Ramadani, Omar Imeri dhe Arbin Zejnullai kanë vendosur të përzgjedhësin ngjyrat kuqezi

Besir Ramadani i Shkupit dhe dy futbollistët e Shkëndijës, Omar Imeri dhe Arbin Zejnullai do të përfaqësojnë Shqipërinë.

Ata kanë zgjedhur të jenë pjesë e kombëtares së drejtuar nga Alban Bushi.

Sipas “Infosport.mk” të tre futbollistët, shqiptarë të Maqedonisë, pritet të ftohen nga trajneri i kombëtares U-21 Alban Bushi, përcjell albinfo.ch.

Lista e të ftuarve të kombëtares U-21 pritet të bëhet publike në ditët në vijim në kuadër të përgatitjeve të kualifikueseve për Evropianin e 2019 që do të zhvillohet në Itali. Më 6 shtator, djemtë e Alban Bushit do të kenë përballë Spanjën.

Shqipëria dhe Italia do të luajnë një miqësore luksi në datën 11 shtator në Kaljari në orën 18:30. Kjo miqësore do të jetë si një test për Alban Bushin, trajnerin e U21 vjeçarëve ku ai do të mund që të shikojë lojtarët e tij dhe të bëjë eksperimentime të reja.

Ditë më parë edhe Besir Demiri ka pranuar ftesën që të vishet kuqezi për ekipin e parë.

Ai do të jetë në shërbim të Christian Panuccit për ndeshjen në Ligën e Kombeve.