Sot nisin protestat kundër kryeprokurorit Lumezi

Pas skandalit me listat e rrejshme të veteranëve të luftës, ku doli se mbi 19 mijë prej tyre ishin të rrejshëm, një grup i qytetarëve ka ftuar për protesta për të kërkuar dorëheqjen e kryeprokurorit të shtetit, Aleksandër Lumezi, përcjell albinfo.ch.

Protesta do të nisë në orën 18:00 dhe pritet të mbahet në Sheshin “Zahir Pajaziti”. Qytetarët në këtë protestë, përveç shkarkimit të kryeprokurorit, do të kërkojnë edhe “Veting të Gjyqësorit”.

“Tash është e qartë: prokuroria është në shërbim të politikës. Edhe po të ketë prokuror/e si Elez Blakaj që ka vullnet për ta luftuar korrupsionin, do të pengohet nga kryeprokurori Aleksandër Lumezi dhe kryeministri Ramush Haradinaj. Qytetari i Republikës në rrethana të tilla duhet të jetë në krye të përgjegjësive dhe detyrave të veta qytetare. Sot, detyrë është kërkesa për shkarkimin e kryeprokurorit Lumezi dhe fillimin e procesit të vetingut për gjyqësorin e vendit tonë. BASHKOHUNI! #protestoj”, thuhet në njoftimin e organizatorëve.