Thaçi: Jo ndarje të Kosovës, po bashkimit të Luginës së Preshevës

Presidenti ka thënë se për marrëveshjen përfundimtare Kosovë-Serbi duhet të vendos populli me referendum

Presidenti i Kosovës, Hashim Thaçi ka folur pas takimit të dytë me liderët e institucioneve, ku ka thanë se kanë diskutuar për hapat e tjerë për dialogun me Serbinë.

Ai ka thënë se të gjithë janë pajtuar që dialogu duhet të vazhdojë. Me gjithë deklarimin e kryeministrit, Ramush Haradinaj se për shkëmbimin e territoreve nuk do të diskutohet në Bruksel, presidenti Thaçi ka thënë se ai do ta shtrojë në takimin e 7 shtatorit në Bruksel kërkesën e shqiptarëve të Luginës për bashkimin e Preshevës, Medvegjës dhe Bujanovcit me Kosovën, përcjell albinfo.ch.

Thaçi ka thënë se këtë do ta bëjë i pëlqeu apo jo dikujt. “Idetë për ndarjen e veriut janë ide të huaja dhe që nuk do të realizohen asnjëherë. Askush nuk duhet ti frikësohet bashkimit të Preshevës, Bujanovcit dhe Medvegjës me Kosovën”, ka thënë presidenti i Kosovës, i cili ka shtuar se çdo marrëveshje që do të arrihet do të ketë mbështetjen e SHBA-së.

Presidenti ka thënë se për marrëveshjen përfundimtare Kosovë-Serbi duhet të vendos populli me referendum. “Nëse dikush dëshiron t’i shpallë luftë Serbisë, urdhëroni Albin Kurti e Isa Mustafa, hairin ia pafshin”, ka thënë ai duke shtuar se “ndoshta ata kanë aftësi teknike e strategjike për luftë, gjë që nuk dihet publikisht. Lufta ka përfunduar. E kemi fituar luftën. Kosova është e lirë dhe e pavarur”, ka përfunduar ai.

---