Haradinaj thotë se po përgatiten për transformimin e FSK-së

Ai ka thënë se Kosova po përgatitet për transformimin e FSK-së në forcë të armatosur, sipas standardeve të NATO-s

Kreu i ekzekutivit kosovar, Ramush Haradinaj, i cili ka marrë pjesë në Forumin e 13-të të Dubrovnikut të Kroacisë, ka thënë se Kosova po përgatitet për transformimin e FSK-së në forcë të armatosur, sipas standardeve të NATO-s, duke synuar bashkëpunimin me vendet aleate në forcimin e stabilitetit në rajon.

Gjatë panelit të diskutimit në këtë forum ai ka theksuar se ekzekutivi po punon që ndërlidhja e rajonit të jetë në funksion të integrimeve evropiane.

“E ardhmja jonë varet nga aftësia për t’iu përshtatur ndryshimeve demokratike, duke e përqafuar agjendën evropiane që i siguron Kosovës prosperitet dhe integrime. Objektivi ynë kryesor mbetet integrimi në BE dhe anëtarësimi në NATO. Kosova ka paguar çmim të shtrenjtë për paqen që ka sot, ia di vlerën dhe është e vendosur për partneritet me të gjitha vendet që janë të përkushtuara për paqen e përhershme në rajonin tonë”, ka thënë Haradinaj.

---