Mjekët italianë të interesuar për investime në Kosovë

Një delegacion i mjekëve italianë nga rajoni i Toskanës shprehen të interesuar për investime në Kosovë

Ministri kosovar i Diasporës, Ibrahim Makolli i inkurajoi përfaqësuesit e Shoqatës së mjekëve të rajonit të Toskanës në Itali, që të vijnë dhe të investojnë në Kosovë. Ai tha se Kosova pavarësisht që është shtet i ri, ka një klimë të përshtatshme për investitorët e huaj.

Këto komente ministri Makolli i bërë gjatë një takimi që zhvilloi me një delegacion të mjekëve italian nga rajoni i Toskanës dhe me përfaqësuesit e komunitetit kosovar në Itali. Qëllimi i vizitës së mjekëve italiano-kosovarë ishte njohja për së afërmi me mundësitë që i ofron Kosova për investitorët potencial.

Sipas MeD-së, ministri Makollin tha se përkundër sfidave të ndryshme, si shtet i ri, në një periudhë për më pak se pesë vjet nga shpallja e pavarësisë, Kosova ka arritur t’i tejkalojë sfidat e ndryshme falë edhe përkrahjes së miqve ndërkombëtar, por edhe diasporës.

“Sot mërgimtarët janë lidhja më e mirë midis dy vendeve, ata janë ambasadori më i mirë që mund t’i ketë një shtet”, tha Makolli.

Edhe pse Kosova, sipas tij, nuk është shtet anëtar i Bashkimit Evropian, eksporti është i liruar nga akciza, dhe politikat fiskale, siç tha ai, janë më të favorshmet në rajon.

Ministri Makolli, iu premtojë përkrahjen dhe mbështetjen për çfarëdo interesimi që prek fushën e investimeve në Kosovë. Ai, njëkohësisht iu ofroi edhe një pasqyrë të klinikave të ndryshme që veprojnë suksesshëm në Kosovë.

Ndërsa në emër të shoqatës së mjekëve në Toskanë, Jacopo Scala, e falënderojë ministrin, siç u shpreh ai, për këto shpjegime shumë të qarta dhe precize.

Sipas MeD, ai tha se tani janë në fazën e studimit të mundësive dhe përzgjedhjes së sektorëve ku ata do mund të investojnë dhe se janë shumë të bindur se në të ardhmen do të prodhohen rezultate konkrete.