Ministri i Punëve të Brendshme i Kosovës, Xhelal Sveçla, ka njoftuar për funksionalizimin e këtij shërbimi, duke e cilësuar si një hap të rëndësishëm në procesin e digjitalizimit të administratës publike dhe përmirësimit të shërbimeve për shtetasit e huaj.
Sipas tij, mundësia e aplikimit online do të ndikojë në thjeshtimin e procedurave dhe në rritjen e efikasitetit të shërbimeve institucionale, duke ua lehtësuar qytetarëve të huaj paraqitjen e kërkesave për lejeqëndrim, transmeton albinfo.ch.
Aplikimi mund të bëhet vetëm nga territori i Kosovës
Një nga kushtet kryesore të këtij shërbimi është që aplikimi elektronik të realizohet vetëm nga brenda territorit të Republikës së Kosovës, në përputhje me legjislacionin në fuqi.
Kjo do të thotë se shtetasit e huaj që ndodhen jashtë Kosovës nuk mund ta shfrytëzojnë këtë mundësi për të paraqitur kërkesën e parë për lejeqëndrim nga vendi ku jetojnë.
Ky është një informacion i rëndësishëm edhe për personat që jetojnë në diasporë dhe planifikojnë të qëndrojnë në Kosovë, por që për shkak të shtetësisë së tyre mund t’u nënshtrohen procedurave për lejeqëndrim.
Vazhdimi i lejeqëndrimit ishte mundësuar më herët
Digjitalizimi i aplikimit të parë vjen pas një shërbimi tjetër të prezantuar në shtator të këtij viti, kur institucionet e Kosovës mundësuan paraqitjen online të kërkesave për vazhdimin e lejeqëndrimit për shtetasit e huaj.
Me shërbimin e ri, platforma e-Kosova zgjeron mundësitë e saj, duke përfshirë edhe aplikimet për herë të parë, përveç kërkesave për vazhdimin e lejeve ekzistuese.
Autoritetet kosovare synojnë që përmes këtyre ndryshimeve të reduktojnë procedurat administrative dhe të krijojnë një sistem më të qasshëm dhe më efikas për përdoruesit e shërbimeve publike.
Personat e interesuar mund të paraqesin kërkesën përmes platformës shtetërore e-Kosova, në shërbimin përkatës për lejeqëndrim.
Linku për aplikim: https://ekosova.rks-gov.net/744