Në aksionin “Ta pastrojmë Kosovën” u mblodhën 316 tonë mbeturina

Mbi 316 tonë dhe 46 mijë thasë me mbeturina kanë arritur nga largohen brenda dy ditëve nga më shumë se 109 mijë vullnetarë në aksionin e madh “Ta pastrojmë Kosovën”, i cili filloi edhe zyrtarisht të shtunën, më 15 shtator dhe pritet të vazhdojë deri  më 15 dhjetor të këtij viti.

Aksioni i nisur me iniciativë të Let’s Do It Kosova dhe i mbështetur nga Qeveria e Kosovës, arriti një mobilizim të jashtëzakonshëm të mijëra vullnetarëve, institucioneve qendrore e komunale, organizatave e qytetarëve të shumtë.

Let’s Do It Kosova ju njofton se tani dy prej fokuseve kryesore të fazës së parë të fushatës “Ta pastrojmë Kosovën” janë deponitë më të mëdha ilegale nëpër komuna dhe brezi rrugor, shkruan albinfo.ch.

Tashmë janë hartuar edhe plane bashkërisht me komunat, ku fillimisht do të intervenohet në deponitë më të mëdha që janë evidentuar në territoret e komunave, për të vazhduar pastaj me brezin rrugor, ku janë evidentuar mbi 136 deponi nga vullnetarët e Let’s Do It Kosova.

Drejtori i Let’s Do It Kosova, Luan Hasanaj, ka thënë se ditët e para të fushatës kanë tejkaluar edhe pritshmëritë.