Edhe një punëtor i lënduar rëndë në vendin e punës

Foto ilustrim

Një person ka marrë lëndime të rënda trupore, derisa ishte duke kryer disa punime të një shtëpie, me ç’rast muri i porsandërtuar është rrëzuar.

Sipas raportit të Policisë së Kosovës, ngjarja ka ndodhur të mërkurën, rreth orës 13:42, në rrugën “Blerim Ademi”, në Prishtinë.

“Viktima ka pësuar lëndime të rënda trupore”, thuhet në raportin policor, përcjell albinfo.ch.

Siç thuhet në raport, viktima është dërguar në QKUK për trajtim mjekësor dhe gjendja e tij shëndetësore është e rëndë.

“Njësitet relevante dhe Inspektorati i Punës kanë dalë në vendin e ngjarjes”, thuhet ndër të tjera në raportin 24 orësh të Policisë së Kosovës.

Ndërkohë, hetuesit policorë në Mitrovicë kanë arritur të identifikojnë dhe të arrestojnë dy persona të dyshuar për përfshirje në katër raste të ndryshme të veprave panele, ‘vjedhje të rënda’, raste këto të raportuara muaj më parë në zonën e përgjegjësisë së stacionit policor ‘Jugu’ në Mitrovicë, thuhet tutje në raportin policor.