Një muaj paraburgim për deputetin Milaim Zeka

Pas arrestimit të deputetit të Nisma-s, Milaim Zekës dhe pas kërkesës së prokurorisë për paraburgimin e tij, gjykata ka vendosur 30 ditë paraburgimi.

Gjykata Themelore në Prishtinë e ka caktuar masën e paraburgimit prej një muaji ndaj deputetit të Nismës Socialdemokrate, Milaim Zeka.

“Ekziston dyshimi i bazuar se i pandehuri M.Z. ka kanosur Prokurorin e Prokurorisë Speciale, Afrim Shefkiu, për shkak të detyrës zyrtare, i cili ndaj të pandehurit Zeka ka ngritur aktakuzë në Gjykatën Themelore në Prishtinë. Gjykata ka konstatuar se kërkesa për caktimin e masës së paraburgimit kundër të pandehurit është masë adekuate dhe e domosdoshme në këtë fazë të procedurës, për sigurimin e pranisë së tij në procedurën penale dhe zhvillimin e papenguar të procedurës”, thuhet në njoftimin e gjykatës.

Avokati i Milaim Zekës, Gazmend Halilaj, ka thënë se do të ankohen në Gjykatën e Apelit, pas vendimit të Gjykatës Themelore që klientit të tij t’i caktohet masa e paraburgimit prej 30 ditësh.

---