Haradinaj: PDK-ja do ndryshimin e tre ministrave

Ministri i Drejtësisë së Kosovës, Abelard Tahiri, ia ka dorëzuar të hënën dorëheqjen kryeministrit të Kosovës, Ramush Haradinaj. Veprimin e ka konfirmuar vetë Haradinaj në një intervistë për televizionin T7.

Kryeministri ka thënë se mund të priten edhe të tjera dorëheqje, meqë kryetari i PDK-së, Kadri Veseli, është i interesuar të ndërrojë disa nga ministrat e partisë së tij, përcjell albinfo.ch.

“Ka një kërkesë të PDK-së për ndryshimin e së paku tre ministrave. Unë këtu nuk mund të përzihem, pasi kështu e përcakton marrëveshja e koalicionit”, ka thënë Haradinaj.

Ai ka mbrojtur edhe emërimin e ministrit të Tregtisë, Endrit Shala, i cili ka aktakuzë të ngritur nga gjykata për gjuajtje me armë. Ndryshimet po bëhen për shkak të pakënaqësisë së Veselit me pjesëmarrjen e dy ministrave të tij në spektaklin e së shtunës të presidentit Thaçi në Ujman.

Kryetari i PDK-së, edhe nga Britania e Madhe, e ka kritikuar vizitën e Thaçit në Ujman për kohën kur është bërë. Përveç ministrit të Drejtësisë, në vizitën e presidentit në veri ka qenë edhe ministri i Financave, Bedri Hamza.