Danimarka ndalon veturat me naftë dhe benzinë

(KEYSTONE/Melanie Duchene)

Hamburgu ishte qyteti i parë që në një pjesë ndaloi veturat me naftë, për të mos ndotur ambientin. Më pas këtë rrugë e ndoqën edhe disa qytete gjermane, por edhe në Itali e vende të tjera.

Megjithatë, Danimarka ka shkuar edhe një hap më tutje, dhe ka bërë të ditur se do të ndalojë shitjen e veturave me naftë dhe benzinë deri në vitin 2030, përcjell albinfo.ch.

Vendi i biçikletave dëshiron të jetë shembull në Evropë. Kryeministri Lars Løkke Rasmussen tha se për 12 vjet pret që plani të funksionojë. Synimi është që të jetë shembull për vende të tjera, dhe të ndalojnë edhe veturat me naftë e benzinë, në mënyrë që të kenë një ambient sa më të pastër.

Me këtë, autoritetet daneze i janë bashkuar përpjekjeve ndërkombëtare për të promovuar ekskluzivisht automjetet elektrike, të cilat synojnë të ulin ndotjen e ajrit dhe të hyjnë në një luftë më serioze kundër ndryshimit të klimës.