Gara globale për zhvillimin e inteligjencës artificiale po shkakton mungesë të komponentëve elektronikë, duke rritur ndjeshëm çmimet e telefonave të mençur, kompjuterëve, tabletëve dhe pajisjeve të tjera teknologjike.
Kërkesa e madhe për memorien operative RAM dhe komponentët e tjerë po nxitet kryesisht nga qendrat e të dhënave që mbështesin teknologjitë e inteligjencës artificiale. Si pasojë, prodhuesit kryesorë po orientohen drejt këtij tregu, duke kufizuar furnizimin për konsumatorët e zakonshëm.
Sipas të dhënave nga tregu zviceran, çmimet e disa produkteve të Apple janë rritur ndjeshëm, ndërsa edhe kompjuterët e nivelit të lartë po kushtojnë shumë më tepër. Çmimi i memories RAM është rritur për 300 deri në 350 për qind brenda një viti, ndërsa memoria për ruajtjen e të dhënave është dyfishuar.
Përballë këtyre shtrenjtimëve, gjithnjë e më shumë konsumatorë po zgjedhin modele më të vjetra dhe telefona të rinovuar. Një kompani në Gjenevë, e specializuar në këtë sektor, pret të shesë rreth 8.000 telefona të rinovuar gjatë vitit 2026, krahasuar me 6.000 sa kishte shitur një vit më parë.
Ndërkohë, perspektivat për përmirësimin e situatës mbeten shqetësuese. Prodhuesi Micron ka njoftuar se pothuajse e gjithë prodhimtaria e tij për vitin 2027 është rezervuar, ndërsa SK Hynix parashikon që kërkesa për komponentë të vazhdojë të jetë më e madhe se oferta deri në vitin 2030.
Kriza, e njohur edhe si “RAMaggedon”, po dëshmon se zhvillimi i shpejtë i inteligjencës artificiale po ndikon drejtpërdrejt edhe në tregun e konsumit, duke i bërë pajisjet elektronike gjithnjë e më të shtrenjta.
