Mustafa: LDK nuk merr pjesë në dialogun me Serbinë, as me Thaçin as me Qeverinë

Kreu i Lidhjes Demokratike të Kosovës, Isa Mustafa me anë të një postimi në rrjetin social “Facebook” ka shkruar se LDK nuk do të marrë pjesë në dialogun.

“LDK e ka thënë qartë se tani në asnjë rast nuk do të bëhet pjesë e dialogut me Serbinë, as në ekipin e Presidentit dhe as të Qeverisë”, ka shkruar Mustafa.

Mustafa ka thënë se janë duke punuar për zgjedhje të parakohshme.

“Do të punojmë që zgjedhjet e parakohshme të ndodhin sa më shpejtë, sepse LDK ndan bindjen e pjesës dërmuese të qytetarëve të Kosovës se qeverisja e tanishme e vendit është e dëmshme për Kosovën dhe ardhmërinë e saj. Deri në shpartallimin e këtij koalicioni, LDK nga këndi i opozitës do të mbroj interesat e vendit, në bashkëpunim edhe me partitë e tjera që i qëndrojnë besnike opozitarizmit”, ka thënë Mustafa.

Tutje sipas Mustafës, LDK ka filluar të intensifikoj punën Brenda organizatave vendore të LDK-së.

“Nga ky muaj kemi filluar të intensifikojmë punën me organizatat vendore të LDK-së. Po diskutojmë për prioritetet, të cilave duhet tu përmbahemi si LDK në komuna dhe në nivel qendror, për ndryshimet që duhet të ndodhin, në mënyrë që Kosova të qeveriset mirë e pa korrupsion. Po shkëmbejmë mendime me strukturat dhe anëtarësinë e LDK-së për temat me rëndësi të veçantë për Kosovën. Po bëhemi gati ta rimarrim qeverisjen e vendit, duke ofruar zgjidhje evropiane për proceset që na presin”, ka thënë ai.