Mustafa: Pas zgjedhjeve, e miratojmë rezolutën për dialogun

Kryetari i Lidhjes Demokratike të Kosovës, Isa Mustafa, ka deklaruar se marrëveshja përfundimtare me Serbinë duhet të ndodhë bazuar në Kushtetutën e Kosovës dhe se ajo mund të bëhet vetëm me një pajtueshmëri të gjerë të forcave politike, pas zgjedhjeve nacionale.

Ai në një postim në Facebook shkruan se Qeveria Haradinaj nuk ka vota e as fuqi politike për një marrëveshje të tillë dhe se për këtë sjellje, sipas tij, kjo qeveri është dashur të japë dorëheqje, e jo të manovrojë me dialogun si instrument i mbijetesës, përcjell albinfo.ch.

“Duke lexuar opinione të ndryshme, fitohet përshtypja se po bëhet garë se kush po i thotë më shumë e më fort Presidentit se e ka keq me përhapjen kokëfortë të teorive të tij shumë konfuze, por të rrezikshme, për korrigjim të kufirit me Serbinë, si zgjidhje e marrëveshjes përfundimtare. Qe e ka keq dhe gabim? E ka! Por shtrohet pyetja se kush ia dha shansin që ta ketë keq”, ka thënë Mustafa.