70 për qind e të rinjve duan të ikin jashtë vendit

Kështu thotë një studim i publikuar nga fondacioni ‘Fridrih Ebert’ në Tiranë

96 % e të rinjve në Shqipëri nuk i besojnë politikës dhe drejtimit politik në vend, 70 % e tyre duan të emigrojnë jashtë shtetit dhe 80 % e rinisë shqiptare kanë shqetësim kryesor papunësinë dhe varfërinë.

Kështu thotë një studim i publikuar nga fondacioni ‘Fridrih Ebert’.

Në studimin: “Rinia shqiptare 2011 me besim për të ardhmen dhe dyshim për të tashmen“ janë përfshirë grupmoshat nga 16-27 vjeç dhe janë pasqyruar mendimet e  të rinjve në Shqipëri.

Sipas këtij studimi, të rinjtë nuk duket se kanë ndonjë ndikim në rrjedhën e ngjarjeve, ndërsa shprehen skeptikë për shumicën e pyetësorit.

Për drejtorin e fondacionit, ‘Friedrich Ebert’, i cili mundësoi edhe këtë studim, Frank Hantke, këto gjetje janë të habitshme për një vend demokratik, duke e quajtur jetën e rinisë shqiptare si skizofrenike, transmetojnë medita e Tiranës.

“Kjo tregon se çfarë probleme ka në Shqipëri, siç është papunësia. Lidhja me politikën shikohet si siguri për të ardhmen. Duhen planifikuar sa më parë politika dhe vende të reja pune, rinia duhet të jetë kryefjala e çdo gjëje, kjo është e çuditshme për një vend demokratik”, citohet të ketë thënë Hantke.