Në pranga dy të kërkuarit e Rastit “Monstra”

Policia e Kosovës ka arrestuar të dielën mbrëma në Prishtinë dy të kërkuarit për vrasjen e pesëfishtë në liqenin Smilkovc afër Shkupit

Dy të kërkuarit për vrasjen e pesëfishtë në liqenin e Smilkovcit të Shkupit janë arrestuar të dielën mbrëma në Prishtinë. Policia e Kosovës ka konfirmuar se në lagjen “Bregu i Diellit” janë arrestuar dy të kërkuarit nga Interpoli, Afrim Ismajloviq dhe Alil Demiri.

Zëdhënësi i policisë kosovare, Arbër Beka ka thënë për REL, se të dyshuarit janë prangosur të dielën mbrëma, ndërsa më vonë janë identifikuar si persona në kërkim nga Interpoli në bazë të fletarrestit që kanë lëshuar autoritetet maqedonase.

“…Raportet që na kanë arritur, nuk japin detaje, se për çfarë vepra dyshohen të kërkuarit me flet-arrest ndërkombëtar,” tha Beka.

Arrestimin e dy të kërkuarve për vrasjen e pesëfishtë e ka konfirmuar edhe ministrja e Punëve të Brendshme në Maqedoni, Gordana Jankullovska. “Kolegu Bajram Rexhepi në bisedën telefonike më njoftoi se policia e Kosovës dje ka arrestuar dy persona, të cilët i përgjigjen përshkrimit dhe para policisë janë prezantuar si Alil Demiri dhe Afrim Ismailoviq”, ka thënë ajo.

Sipas Jankullovskes, ata dyshohen për vrasjen në liqenin e Smillkovës dhe pas vrasjes së tmerrshme ishin në arrati, dhe ata kërkoheshin edhe nga Interpoli.

“Duke marrë parasysh faktin se personat nuk posedojnë dokumente për vërtetimin e identitetit, do të bëhen të gjitha kontrollet e domosdoshme, dhe pas indetifikimit të plotë, gjatë ditës së nesërme, do të dalim me infromacione zyrtare. Në bashkëpunim me autoritetet kosovare do të bëjmë gjithçka të mundur për ekstradimin e tyre në Maqedoni”, ka thënë ajo.

Ndryshe, një vjet më parë, më 11 prill 2012, në Liqenin Smilkovcë afër Shkupit, katër të rinj maqedonas dhe një 45 vjeçar peshkatar, janë ekzekutuar me armë automatike.

Ky krim, i cilësuar si rasti “Monstra” pati shkaktuar tensione dhe trazira ndëretnike në Maqedoni.

Lidhur me këtë rast policia e Maqedonisë arrestoi mbi 20 shqiptarë, të cilët besohet se ishin pjesë e një grupi fetar, që kishin një lloj lidhje me vrasjen e pesëfishtë. Por, në fund, autoritetet ngritën aktakuzë për pesë të dyshuar, vëllezërit Afrim dhe Agim Ismailoviq, Rami Sejdiu, Fejzi Haziri dhe Alil Demiri të gjithë nga Shkupi.

Tre nga të akuzuarit janë arrestuar gjatë aksionit policor “Monstra”, ndërsa dy tjerët Afrim Ismailoviq dhe Alil Demiri, ishin arratisur. Këta të fundit janë gjykuar në mungesë.