Shqiptarët, adhuruesit më të mëdhenj të SHBA-ve

Sipas Gallup, Shqipëria dhe Kosova i japin mbështetje më të fuqishme lidershipit amerikan. Pas tyre radhiten: Irlanda, Mbretëria e Bashkuar, Holanda dhe Italia

Shqipëria dhe Kosova prinë në listën e shteteve që i japin mbështetje  të plotë lidershipit të Shteteve të Bashkuara të Amerikës (SHBA).  Sipas Organizatës Gallup, lidershipi i SHBA-ve ka ruajtur mbështetjen e plotë në gjashtë shtete, ndërsa shqiptarët prinë në këtë listë.

Sipas Gallup, katër shtetet e tjera që i japin mbështetje lidershipit amerikan janë: Irlanda, Mbretëria e Bashkuar, Holanda dhe Italia.

Megjithatë, sipas sondazhit, udhëheqësia e SHBA-së ka dështuar që të marrë mbështetje në shtetet si në Francë, Spanjë dhe Suedi, ku miratimi ka rënë në nivelin e vitit 2011.

Pikëpamjet për lidershipin amerikan kanë vazhduar që të përkeqësohen në shtetet e goditura nga kriza ekonomike, si Hungaria, Kroacia,  Maqedonia e Austria.

Siç raporton REL, Rusia thuhet ta ketë zëvendësuar Serbinë në vitin 2012, si një shtet evropian me miratimin më të ulët për lidershipin amerikan, vetëm 14 për qind.

Në sondazhin e Gallup thuhet se imazhi i udhëheqjes amerikane gjatë vitit të katërt të Barack Obamës si president, ka qenë më dobët sesa në vitet paraprake.

Miratimi mesatar i lidershipit amerikan në 130 shtete ka qenë 41 për qind në vitin 2012, krahasuar më 49 për qind sa ishte në vitin e parë të Obamës si president. Me gjithë këto shifra të ulëta, miratimi prapë mbetet më i lartë sesa që ishte në fund të administratës  Bush.