Familja Osmani mund të kthehet

Nëna së bashku me fëmijët 7 dhe 13 vjeçarë ishin dëbuar në Kosovë ndërsa djali 16 vjeçar dhe babai kishin mbetur në Gjermani

Ministri i brendshëm i landit Niedersachsen (Saksoni e ulët), Boris Pistorius ka vendosur të kthejë sërish në Gjermani familjen kosovare Osmani, të dëbuar rreth dy javë më parë në Kosovë. Nëna së bashku me fëmijët 7 dhe 13 vjeçarë me atë rast ishin dëbuar në Kosovë ndërsa djali 16 vjeçar dhe babai kishin mbetur në Gjermani.

Ministri, i cili qe ngritur në këtë post vetëm pak ditë para dëbimit të familjes, ishte gjendur nën zjarrin e kritikave të opinionit dhe të opozitës për vendimin e marrë.

“Ne e kemi lutur Ministrinë e Jashtme në Berlin që të përgatisë vizat për nënën dhe fëmijët, ka thënë Pistorius në Hannover. Atyre, sipas tij, do të duhej tu mundësohet një kthim i shpejtë në Gjermani. “I mbetet tash Ministrisë së Jashtme, nëse i miraton vizat”, ka thënë ministri, duke shtuar se me këtë rast bëhet fjalë për bashkimin e një familjeje të ndarë pa të drejtë. Por, edhe me kërkesën për t`i mundësuar kthimin, statusi i familjes Osmani nuk është ende i zgjidhur. Për të duhet të vendoset më vonë