Pjetër Nrecaj që vrau gruan dhe vajzën, pranon fajësinë

Seanca gjyqësore ndaj Pjetër Nrecajt është shtyrë për 31 tetor, pasi ai ka pranuar fajësinë për vrasjen e bashkëshortes Valbonës dhe vajzës së tij. Prokurori është pajtuar që të negociojë për marrëveshjen për pranimin e fajësisë, i propozuar nga mbrojtja e Nrecajt, përcjell albinfo.ch.

Para se të deklarohej i pandehuri, fjalën e ka marrë avokatja mbrojtëse e tij Fehmije Zhubi, duke thënë se i vjen keq për ngjarjen tragjike për çka u shpreh ngushëllime për humbjen e anëtarëve të familjes.

“Kjo ngjarje tragjike e ka goditur edhe të mbrojturin tim. Unë sot para këtij shqyrtimi kam biseduar me të akuzuarin dhe kemi vendosur që të paraqesim kërkesë për shtyrje dhe të bëjmë përpjeke që të negociojmë pranimin e fajësisë”, ka thënë ajo.

Prokuroria Themelore në Gjakovë më 27 shtator ka ngritur aktakuzë ndaj Pjetër Nrecajt për vrasjen e bashkëshortes Valbona Nrecaj dhe vajzës së tyre. Sipas aktakuzës së Prokurorisë i akuzuari më 7 gusht, në Gjakovë, në shtëpinë e familjes së viktimës, me dashje ka privuar nga jeta bashkëshorten dhe vajzën e tij.