Mashtrimi për vizat, Zeka e të tjerët deklarohen të pafajshëm

Është mbajtur seanca fillestare në rastin e deputetit Milaim Zeka, i cili akuzohet për mashtrim dhe pastrim të parave.

Deputeti Zeka është deklaruar i pafajshëm ndaj akuzave. Në këtë rast janë të akuzuar edhe Ilir Krasniqi e Edmond Kërliu.

Që të dy janë deklaruar të pafajshëm. Sipas aktakuzës, Ilir Krasniqi dhe Milaim Zeka që nga viti 2016 e deri në mars të viti 2017, me qëllim të përfitimit të kundërligjshëm  pasuror, fillimisht në vitin 2016, kanë regjistruar biznesin si agjenci punësimi, ku kanë paraqitur fakte të rreme kinse për punësimin e qytetarëve të Kosovës në Gjermani, ashtu që të pandehurit Ilir Krasniqi dhe Milaim Zeka kanë mashtruar 900 aplikues për viza pune. Seanca e radhës është caktuar për 30 nëntor.

Seanca e kaluar kishte dështuar në mungesë të Milaim Zekës, i cili ndodhej në paraburgim në lidhje me një rast tjetër, ku ai dyshohet për kanosje ndaj një prokurori.