Investimi në ujë, prioritet i qeverisë

Institucionet e Kosovës premtojnë investime në rehabilitimin dhe zgjerimin e sistemeve të furnizimit me ujë, grumbullimin dhe trajtimin e ujërave të zeza dhe për zhvillimin e resurseve të reja

Pavarësisht se Republika e Kosovës është një vend i cili konsiderohet me rezerva të kufizuara të resurseve ujore, Qeveria e Kosovës është zotuar që, në bashkëpunim me donatorët, të vazhdojë investimet në zhvillimin e kapaciteteve për furnizim me ujë.

Në ditën botërore të Ujit, përfaqësuesit e institucioneve të Kosovës deklarojnë investime në  rehabilitimin dhe zgjerimin e sistemeve të furnizimit me ujë, grumbullimin dhe trajtimin e ujërave të zeza dhe për zhvillimin e resurseve të reja ujore.

Kështu ka deklaruar drejtori i Departamentit të Ujërave në Kosovë, Naser Bajraktari. 

Ndërkaq zyrtarja e lartë në Ministrinë e Mjedisit dhe Planifikimit Hapësinor, Mrikë Macula tha se gjatë këtij viti të fillohet ndërtimi i fabrikës për trajtimin e ujërave të ndotura në Prizren.

“Deri më tani është arritur të hartohen studime fizibiliteti për trajtimin e ujërave të ndotura për qytetet Pejë, Gjakovë dhe Prizren, në rrugë të mbarë është edhe studimi i fizibilitetit për  trajtimin e ujërave të  ndotura për qytetin e Prishtinës (finacuar nga KfW). Po ashtu është arritur që Ligji i ujërave të kalojë edhe leximin e dytë në Kuvendin e Kosovës dhe shpresoj që shumë shpejt do të  hyjë në fuqi”, ka thënë Macula.

Kosova në vijimësi ballafaqohet me mungesë të ujit, për shkak të mosplanifikimit qeveritar për akumulimin e ujërave. Por, nuk është vetëm Kosova, edhe gjysma e të gjithë njerëzve të planetit,ballafaqohet me mungesën e rezervave të ujit të pijshëm.  

Republika e Kosovës edhe pse është e pasur me lumenj, megjithatë furnizimi me ujë nuk është në nivelin e duhur. Sipas statistikave, rreth gjysma e qytetarëve të Kosovës është e lidhur me sistemin e ujësjellësit, ndërsa një numër i konsiderueshëm i qytetarëve që jetojnë në zona rurale, furnizohen nga puset në mënyrë individuale.

Megjithatë, uji  me të cilin furnizohen qytetarët e Kosovës është i kualitetit të duhur. Cilësia e ujit që pinë kosovarët, nga sistemi publik i ujësjellësit, vazhdimisht mbikëqyret nga Instituti Kombëtar i Shëndetësisë Publike (IKSHP), i cili është institucion kompetent për të vlerësuar kualitetin e ujit. 

Sipas analizave të rregullta që kryen ky Institut, uji i pijshëm i sistemit publik të Ujësjellësit që konsumojnë qytetarët e Prishtinës dhe të të gjitha qyteteve të tjera, është në përputhje me standardet e vendit tonë.