Ujërat e zeza që janë derdhur për vite të tëra në bregdetin e Durrësit, do të shkarkohen në landfillin gjigant, të ndërtuar në Shën Vlash. Me këtë investim, autoritete shqiptare do t’ia kthejnë “shkëlqimin” bregdetit të Durrësit, i cili ka qenë destinacion i turistëve kosovarë për disa vite.

Aksioni për ndërtimin e kanalit gjigant do të nisë së funksionuari nga data 1 prill, duke i quar ujërat e zeza nga hotelet e Durrësit në vendin e quajtur Shën Vlash. Sipas medieve shqiptare, ka përfunduar gjithçka, duke nisur që nga instalimi i rrjetit, deri te vënia në funksion e makinerive dhe pompave gjigante.

Drejtori i Ndërmarrjes së Ujësjellës-Kanalizimeve në Durrës, Doklead Ademi ka thënë për gazetën “Panorama”, se investimi ka përfunduar dhe pritet që këto ditë impianti të vihet në punë.

 Ai garanton se këtë sezon bregdeti i Durrësit, por edhe i Golemit, do të jenë më të pastër se dikur, kur në zonë nuk kishin nisur ndërtimet.

“Bregdeti i Durrësit është akuzuar ashpër për ndotjen dhe jo pa të drejtë. Është e vërtetë, pasi ndotja ka qenë në nivele të papranueshme, sepse shumë biznese dhe banesa, sidomos në zonën e Plazhit dhe të Golemit, ujërat e zeza i derdhnin në det”, ka deklaruar Ademi.  

Ky fenomen, sipas tij, do të marrë fund, me investimin e kryer. “Impianti i Shën Vlashit ka përfunduar dhe më 1 prill vihet në funksion të plotë. Investimi garanton rehabilitimin e të gjithë zonës bregdetare, duke nisur që nga Ura e Dajlanit deri te Mali i Robit”, tha Ademi.

Investimi i mësipërm, siç tha ai, do t’i japë fund një herë e përgjithmonë ndotjes së detit, prej së cilës një pjesë e mirë e pushuesve e braktisën Durrësit.Tashmë impianti është në pritje të vënies në funksion për të sterilizuar ujin që thithet nga pompat në pika të ndryshme për të përshkuar më pas të gjithë gjatësinë, nga pjesa jugore e qytetit të Durrësit deri në Shën Vlash.

Shtrirja e rrjetit të mbledhjes së ujërave të zeza ka qenë i domosdoshëm dhe emergjent, sidomos në zonën turistike të Golemit, Pishat e Buta, Mali i Robit, Shkëmbi i Kavajës e në Plazh, ku ujërat e zeza vërshonin lumë në det.