Kosova e para në rajon për ikje nga tatimi

Sipas Grupit për Studime Juridike dhe Politike dhe Odës Ekonomike e Kosovës (OEK), kjo ikje nga tatimi rezulton në një mjedis jo të drejtë të tregut

Sumë ndërmarrje afariste në Kosovës nuk e respektojnë ligjin për të paguar tatimin në shitje dhe në qarkullim. Kjo ka ndikuar që Republika e Kosovës ta ketë shkallën më të lartë të shmangies së tatimit në rajon. Ky mosinkasim siç thuhet, vjen  si pasojë e inspektimit të dobët dhe politikave fiskale jofavorizuese.

Sipas Grupit për Studime Juridike dhe Politike dhe të Odës Ekonomike e Kosovës (OEK), kjo ikje nga tatimi rezulton në një mjedis jo të drejtë të tregut për ndërmarrjet formale, raporton “Zëri”.

Safet Gërxhaliu është kryetar i Odes Ekonomike të Kosovës. Ai tha se problem akut është mosmarrja në konsideratë e rekomandimeve të OEK-ut për zgjidhjen e problemeve të bizneseve, të cilat nga viti në vit po shtohen, shqetësimet rreth rënies së numrit të investimeve të huaja.

Ai i rekomandoi Qeverinë e Kosovës që të orientohet në prodhimtarinë vendore dhe përmes politikave adekuate ekonomike të mbështesë sektorin privat dhe të kontribuojë në zhvillim të qëndrueshëm ekonomik.

“Problemet aktuale mbeten sfidë derisa nuk jetësohet sundimi i rendit dhe ligjit në vendin tonë”, tha Gërxhaliu duke kërkuar të forcohet më shumë rendi dhe ligji.