RRGK reagon për dënimin e Pjetër Nrecajt, i cili vrau gruan dhe vajzën e tij

Rrjeti i Grave të Kosovës ka reaguar ndaj verdiktit të gjykatës për ta lënë Pjetër Nrecajn në burg për 24 vjet.

Sipas Rrejtit të Grave, ky dënim është i ulët dhe se, sipas tyre: ‘Neni 179 i Kodit Penal të Repubikës së Kosovës, qartazi e ka të caktuar dënimin për Vrasjen e Rëndë, ku thuhet se personi që shkakton vrasjen e anëtarit të familjes apo të fëmijës, dënohet me burgim të përjetshëm’.

“Në kohën kur shoqëria po alarmohet nga rritja e rasteve të dhunës ndaj vajzave dhe grave dhe kur të vetmen shpresë e kemi drejtësinë dhe përgjegjësinë e organeve të rendit dhe sigurisë, RRGK shprehet e shqetësuar nga lajmit për dënimin e ulët, prej 24 vjet heqje lirie, që iu shqiptua Pjetër Nrecajt për vrasjen e ish-bashkëshortes dhe vajzës, shto këtu edhe armëmbajtje pa leje”, thuhet në reagimin e tyre.

Pjetër Nrecajt kishte vrarë gruan 40-vjeçare dhe vajzën e tij 9-vjeçare në shtëpinë e prindërve të gruas.

Vrasja kishte ndodhur në Brekoc të Gjakovës.

“Vrasësi kohë më parë ishte mbajtur në paraburgim (maj 2018) për ushtrim të dhunës në familje ndaj të ndjerës, për veprën penale “Lëndim i lehtë trupor”. Policia e Kosovës ka qenë në dijeni për historikun e tij prej krimineli, përderisa gjykata e kishte liruar pas një muaji mbajtje paraburgim. Në Kodin Penal të Republikës së Kosovës, dënimi minimal për këtë vepër penale është 3 muaj deri në 5 vjet burgim”, thuhet tutje në reagimin e RRGK-së, shkruan albinfo.ch.