Shkodër, rreth 3500 hektarë nën ujë

Nga hidrocentrali i Vaut të Dejës shkarkohen rreth 800 metër kub në sekondë, duke bërë që uji në Liqenin e Shkodrës t’i prekë pikat e limitit. Rreth 3500 hektarë janë nën ujë

Reshjet e mëdha të shiut që kanë përfshirë Shqipërinë, kanë ndikuar që Liqeni i Shkodrës të dal nga shtrati, duke përmbytur qindra hektarë tokë të qarkut verior të Shqipërisë. Sipas medieve shqiptare, uji ka shkaktuar përmbytje në disa lagje të qytetit të Shkodrës.

Gjithashtu e njëjta situatë paraqitet dhe në fshatin Obot ku prej javësh rezultojnë banesa të izoluara nga uji. Për shkak të reshjeve të shumta të shiut dhe shkarkimeve nga Vau i Dejës, edhe ditën e mërkurë është rritur niveli i ujit duke sjellë izolimin e 270 banesave.

Siç raporton “Shekulli”, niveli i ujit në fshatin Obot dhe Dajç ka arritur rreth 1 metër. Ndërsa nga shkarkimet e ujit në Vaun e Dejës, janë përmbytur disa lokacion afër Velipjes.

Nga hidrocentrali i Vaut të Dejës shkarkohen rreth 800 metër kub në sekondë, për shkaka se uji në liqenin e Fierzë e ka shtuar dukshëm vëllimin, sepse reshjet e mëdha të shiut në Kosovë kanë shtuar nivelin e ujit në lumin Drini i Bardh.

Gjithashtu sipas ekspertëve, lëshimi ujit nga Fierza, ndikon që niveli i ujit në Liqenin e Shkodrës të rritet shumë dhe të prekë pikat limit. Shtim të sipërfaqes nën ujë ka edhe në zonat rreth qytetit të Shkodrës.

Shtabi i emergjencës pranë Prefekturës së Shkodrës, sipas këtij raporti, ka deklaruar se situata është nën kontroll të plotë. Ndërkohë që vetë banorët e përmbytur deklarojnë të kundërtën.

Ata pohojnë se po mbijetojnë dhe janë vetëm në dorë të zotit, pasi njerëzit nuk po kujtohen për ta. Nga llogaritjet e fundit, mësohet se rreth 500 hektarë tokë i janë shtuar sipërfaqes së përmbytur, duke arritur në total në 3500 hektarë.