Gjermanët ofruan 277 milionë euro për PTK

Pas hapjes së ofertave, Komisioni Qeveritar për Privatizim i ka rekomanduar Qeverisë së Kosovës që ta shpallë fituese kompaninë gjermane Axos GMBH

Kompania gjermane Axos GMBH, në konsorcium me Najafi Company, ka ofruar 277 milionë për blerjen e 75 për qind të aksioneve të Postës dhe Telekomit të Kosovës (PTK), duke lënë mbrapa konkurrentin tjetër nga Libani “M1 International Limited”, e cila ka ofruar 150 milionë e 10 mijë euro.

Në bazë të këtyre dy ofertave, Komisioni Qeveritar për Privatizim i ka rekomanduar Qeverisë së Kosovës që ta shpallë fituese kompaninë gjermane Axos GMBH.

Ky rekomandim i Komisionit erdhi pa hapjes së ofertave për privatizimin e PTK-së. Në garë kanë qenë dy kompani. Qeveria e Kosovës, ndërkaq do të vendosë nëse e pranon rekomandimin Komisionit, apo e kthen në nisje procesin e privatizimit të PTK-së.

Ministri i Zhvillimit Ekonomik, Besim Beqaj, siç raporton “Express” i ka rekomanduar Qeverisë për të marrë vendimin final për të privatizuar 75 për qind e aksioneve të PTK- së. “Në mbledhjen e ardhshme do të merret vendimi në Qeveri”, ka thënë ministri Beqaj.

Kompania që humbi garën, “M1 International Limited nga Libani”, ishte parë me skepticizëm dhe frikë në opinionin publik të Kosovës. Sië kanë raportuar mediet e Prishtinës, kjo kompani dyshohet se ka lidhje me grupin islamik “Hezbollah”.

Ndryshe, Axos Capital Partners është shoqëri aksionare investuese e investitorëve ndërkombëtarë të teknologjisë dhe telekomi, me bazë në Hamburg të Gjermanisë.

Najafi Companies LLC është një firmë private ndërkombëtare e investimeve me bazë në Phoenix, Arizona (SHBA) dhe me zyra në New York, Paris, Toronto. Najafi Companies LLC ka investime në sektorët e medias, teknologjisë, energjisë, industrisë dhe pasurive të patundshme në SHBA, në Evropë dhe vende të tjera të botës.