“Finalja” për kuqezinjtë

Shqipëria do të ndeshet me Skocinë nga ora 20:45 në “Loro Boriçi” të Shkodrës

Shqipëria ndeshet sonte me Skocinë në Shkodër, në ndeshjen e fundit dhe vendimtare për kuqezinjtë në Ligën e Kombeve, shkruan albinfo.ch.

Kuqezinjtë kanë pak gjasa për kualifikim, por mund të bien në një ligë më poshtë, pra atë D.

Për t’u kualifikuar duhet një fitore 4:0 ndaj Skocisë, dhe më pas kjo e fundit të mposhtë Izraelin 1:0, që duket pak e besueshme. Shqipëria po përballet me shumë mungesa pasi Armando Sadiku, Odise Roshi dhe Amir Abrashi janë të lënduar, kurse nga grumbullimi është larguar edhe Ermir Lenjani për shkak të lëndimit. Sikur të mos mjaftonin këto, Migjen Basha dhe Elseid Hysaj janë të suspenduar.

Lajmi më i mirë për Shqipërinë është se Eros Grezda, duket se do të jetë nga fillimi, duke tejkaluar lëndimin.

Trajneri Christian Panucci shpreson në një fitore ndaj skocezëve, që gjithashtu kanë mungesa.

“Është e qartë që duhet të bëjmë gol. Në Izrael kemi krijuar shumë raste, por ka munguar finalizimi. Grezda është stërvitur veçmas gjithë javën dhe ka disa probleme. Ka kërkuar të luajë, por vetëm të shtunën do të vendosim”, është shprehur Panucci.

Formacioni i mundshëm: Strakosha; Veseli, Gjimshiti, Mavraj, Binaku; Kaçe, Xhaka, Memushaj; Uzuni, Grezda; Balaj.

---