BE konfirmon nënshkrimin e marrëveshjes Kosovë-Serbi

Takimi i dhjetë negociator ndërmjet Prishtinës dhe Beogradit duket se ka dhënë rezultate në Bruksel

Mediet në Prishtinë raportojnë për arritjen e një marrëveshjeje ndërmjet Kosovës dhe Serbisë për normalizimin e marrëdhënieve ndërmjet tyre. Ndërkohë ende nuk janë dhëne detajet e marrëveshjes së arritur të premten në Bruksel. Lajmi është konfirmuar fillimisht nga Bekim Çollaku, këshilltar i kryeministrit të Kosovës, Hashim Thaçi.

Ndërkohë edhe ndërmjetësuesja e këtyre negociatave përfaqësuesja e lartë e Bashkimit Evropian, Catherine Ashton, ka thënë se negociatat kanë përfunduar dhe se tekstit i janë vënë inicialet nga të dy kryeministrat.

“Dua t’i uroj të dy për vendosmërinë dhe guximin që kanë pasur gjatë këtyre muajve. është e rëndësishme që ajo që po shohim ani është një hap më larg nga e kaluara dhe për të dy një hap më afër Evropës”, u ka thënë Ashton gazetarëve në Bruksel. 

Mediat serbe citojnë kryeministrin e Serbisë, Ivica Daçiq, të ketë thënë se ka vënë inicialet në tekstin e propozuar, për pranimin ose refuzimin e të cilit të dyja palët do të deklarohen gjatë ditëve në vazhdim. 

Shefja e BE-së për Politikë të Jashtme dhe Siguri, baronesha Catherine Ashton ka kthyer nga dje nga gjysma e rrugës, kryeministrin Hashim Thaçi dhe delegacionin kosovar për t’i vazhduar negociatat të premten në Bruksel me delegacionin e Beogradit, që drejtohet nga kryeministri Ivica Daçiq.