Gazetarët në Kosovë thonë se përballen me kërcënime

AGPK, përmes një performance, ka vendosur një kukull me kollare rreth qafe, me disa dokumente nën këmbë, para objektit të Qeverisë në Ditën Ndërkombëtare të Lirisë së Shtypit

Gazetarët kosovarë janë ankuar në Ditën Ndërkombëtare të Lirisë së Shtypit, se në Kosovë ende mbetet shqetësuese siguria e tyre. Në raportin e organizatës Freedom House për lirinë e medieve në botë, të publikuar dy ditë më parë, Kosova edhe këtë vit është radhitur në mesin e vendeve ‘pjesërisht të lira’. Madje, sipas organizatës me seli në SHBA, Kosova ka shënuar një hap prapa.

Gazetarët, në shtetin e ri të Kosovës, vazhdojnë të përballen me kërcënime, frikësime e forma tjera të pengimit të tyre në punë, ndërsa disa prej tyre, kanë qenë objekt edhe të sulmeve fizike.

Kryetarja e Asociacionit të Gazetarëve Profesionist të Kosovës, Liridona Lluka-Gashi ka thënë se 3 maji është shpallur Dita Botërore e Lirisë së Shtypit për të ngritur vetëdijen dhe rëndësinë e lirisë së shtypit dhe për t’ua kujtuar qeverive detyrën që kanë në drejtim të respektimit të të drejtës së shprehjes së lirë që është e garantuar me nenin 19 të Deklaratës së Përgjithshme të të Drejtave të Njeriut.

Në anën tjetër gazetarët thonë se janë vazhdimisht duke u përballur me kërcënime të formave me të ndryshme.

Në rastet kur gazetarët janë kërcënuar, Policia e Kosovës është dashur disa herë t’u dalë në mbrojtje gazetarëve të kërcënuar. Zëdhënësi i Policisë, Baki Kelani ka thënë se ka pasur disa raste kur gazetarët është dashur të shoqërohen nga policia në kryerjen e punës së tyre.

Më pas, AGPK, përmes një performance, ka vendosur një kukull me kollare rreth qafe, me disa dokumente nën këmbë, para objektit të Qeverisë më 3 maj, në Ditën Ndërkombëtare të Lirisë së Shtypit.

AGPK-ja, në emër të gazetarëve, kanë kërkuar që Qeveria të emëroj një zëdhënës dhe të lejojnë qasje në dokumente zyrtare por kjo nuk ka ndodhur, andaj AGPK-ja, edhe një herë, ka bërë thirrje që këto të rregullohen sa më shpejtë.