I merret mandati i deputetit Nikolla Gruevskit

Komisioni parlamentar për çështjet e rregullores, mandatit dhe imunitetit, me pesë vota për, asnjë kundër dhe asnjë abstenim votoi për marrjen e mandatit të deputetit, të ish-kryeministrit të Maqedonisë, Nikolla Gruevski, i cili aktualisht ndodhet në Hungari.

Votimi ishte iniciuar nga një kërkesë e gjykatës, e cila kërkon paraburgim për Gruevskin, i cili akuzohet në disa procese të ndara gjyqësore.  Me vendimin në fjalë, Komisioni vendosi që t’i marrë imunitetin Gruevskit, për çka i rekomandoi Kuvendit të Maqedonisë të votojë vendimin në seancë plenare, përcjell albinfo.ch.

Kryetari i Komisionit parlamentar për çështjet e rregullores, mandatit dhe imunitetit, Pavle Bogoevski, në fjalimin e tij u shpreh i zhgënjyer nga siç tha,  situata paradoksale e krijuar, ku duhet t’i merret imuniteti një deputeti, i cili ndodhet në arrati dhe të dënuar nga gjykata.

Ish-kryeministri Gruevski është dënuar me dy vjet heqje lirie për rastin “Tanku” lidhur me furnizimin e automjetit luksoz “Mercedes” në vlerë prej 570 mijë eurosh.

Ditë më parë, në profilin e tij në Facebook, ai konfirmoi se Hungaria është përgjigjur pozitivisht në kërkesën e tij për azil, të parashtruar në këtë vend.