Oda Ekonomike e shqetësuar me AKP-në

Dorëheqjet në AKP e kanë shqetësuar OEK-në, e cila kërkon zgjedhje të njerëzve kompetente dhe të gatshme për t’u përballur me sfidat e procesit të privatizimit

Oda Ekonomike e Kosovës është e shqetësuar me zhvillimet e fundit në Agjencinë Kosovare të Privatizimit, prandaj kërkon nga institucionet vendore, respektivisht nga Kuvendi i Kosovës që ta menaxhoj në mënyrën më të mirë procesin e daljes nga kriza nga kjo agjenci.   

Nëpërmjet një komunikate, Oda Ekonomike e Kosovës dhe komuniteti i biznesit në përgjithësi, thonë se janë duke përcjellë me vëmendje dhe shqetësim, zhvillimet e fundit rreth funksionimit të Bordit të AKP-së, të karakterizuara me dorëheqje të anëtarëve dhe Kryetarit të Bordit të AKP-së.

“OEK-u konsideron që të gjitha këto zhvillime, përcjellë me deklaratën e ambasadës së SHBA-së, që përfaqëson shtetin me kontributin më të lartë në shtet ndërtim dhe zhvillim ekonomik, ku konstatohen pengesa serioze në udhëheqjen e transformimit të pronës shoqërore, janë sinjali më i qartë që proceset që udhëhiqen nga AKP-ja nuk po shkojnë mire”, thuhet në reagimin e OEK-së.

Madje sipas tyre, këto zhvillime po shkojnë në dëm të dobi të zhvillimit ekonomik të vendit, “për më shumë po e dëmtojnë seriozisht imazhin e vendit në relacion me investitorët ndërkombëtar”.

OEK-u i jep mbështetje institucionale procesit të transformimit të pronës shoqërore, si një nga parakushtet për krijim të një strukture ekonomike që garanton rritje ekonomike të qëndrueshme.

“Por kjo mbështetje e gjerë nga komuniteti i biznesit duhet të shërbej në dobi të fuqizimit të procesit, e jo në dobi të degradimit të vazhdueshëm të këtij procesi vital për ekonominë e vendit”, thuhet më tej në reagim.

OEK kërkon adresim të qartë, transparent dhe efikas të situatës së krijuar nga ana e Kuvendit të Kosovës dhe institucioneve tjera, përmes dhënies së rekomandimeve koncize për udhëheqje të mëtutjeshme të transformimit të pronës shoqërore nga AKP-ja.

“OEK kërkon zgjedhje të njerëzve kompetente dhe të gatshme për t’u përballur me sfidat e këtij procesi dhe rrethanat ekonomike shoqërore në Kosovë”, thuhet në fund të reagimit.

Deklarata e OEK-së pason dorëheqjen e kryetarit të Bordit të AKP-së, Blerim Rexha një ditë më parë. Dorëheqja e Rexhes erdhi menjëherë pas dorëheqjes së përfaqësueses së ambasadës së SHBA-ve nga ky bord.

Amerikania në deklaratën e saj kishte vërejtje serioze në mënyrën se si e menaxhon bordin Rexha.