Limaj dhe të tjerët lirohen nga arresti shtëpiak

Fatmir Limaj dhe grupi tjerët i përfshirë në rastin “Kleçka” janë liruar nga arresti shtëpiak, pasi dhënies së dëshmisë nga dëshmuari i fundit i mbrojtur

Deputeti Fatmir Limaj dhe nëntë të pandehurit të tjerë në rastin “Kleçka” janë liruar nga arresti shtëpiak. Kështu vendosi të enjten një trup gjykues i përbërë prej gjyqtarëve të EULEX-it dhe gjyqtarëve kosovarë.

Mirëpo, sipas këtij misioni, prej tash e deri në përfundimin e gjykimit kryesor, të pandehurit janë të obliguar që për çdo ditë të paraqiten në stacionin policor. “Pasaportat e tyre mbeten të konfiskuara dhe ata nuk mund të largohen nga Kosova”, njofton EULEX-i.

Trupi gjykues, siç thuhet më tej në njoftim, ka vendosur që ta zëvendësojë masën e arrestit shtëpiak me masën e lajmërimit në stacionin policor, për shkak se në vendimet e mëhershme të Gjykatës së Apelit është thënë se masa e arrestit shtëpiak ishte kryesisht e nevojshme për ta shmangur rrezikun e ndikimit tek dëshmitarët.

Dëshmitari i fundit i prokurorisë ka dëshmuar gjatë seancës gjyqësore kryesore më 5 qershor 2013.

“Kodi i Procedurës Penale i Kosovës parashikon që gjatë zbatimit të masës së kufizimit për të siguruar zhvillimin e suksesshëm të procedurës penale, gjykata duhet të sigurojë që të mos e zbatojë ndonjë masë më të ashpër, nëse do të mjaftonte masa më e butë”, thuhet në njoftim.

Seancat gjyqësore kryesore për këtë rast do të vazhdojnë më 3 korrik 2013, me ç’rast të pandehurit do të fillojnë me paraqitjen e rasteve të tyre.