Ministrat e mbrojtjes të vendeve të Evropës Juglindore dhe përfaqësuesit Aleancës Veriatlantike (NATO) janë dakorduar për të bashkëpunuar ngushtë në vënien e paqes dhe sigurisë në rajon. Këtë koordinim ata e kanë bërë në Konferencën “SHBA-Karta e Adriatikut” që u mbajt në Ohër.
 
Në konferencë me titull “Së bashku drejt paqes dhe sigurisë globale” morën pjesë  përfaqësuesit nga Maqedonia, Shqipëria, Kroacia, Sllovenia, Bosnjë e Hercegovina, Mali i Zi, Sllovenia, Kosova, Bullgaria, Greqia, ndërsa Serbia e ka bojkotuar konferencën.Nikoqiri i konferencë, ministri i Mbrojtjes së Maqedonisë, Talat Xhaferi mes tjerash tha se vendet e Evropës juglindore ballafaqohen me sfida dhe probleme të sigurisë që janë të njëjta ose të ngjashme me ato të të gjitha vendeve të rajonit Euro-atlantik.

 

“Sfidat dhe problemet e përbashkëta kërkojnë edhe zgjidhje të përbashkët dhe vetëm së bashku  mund të kontribuojmë  më tepër për paqen, sigurinë dhe stabilitetin në rajon dhe në Evropë”, deklaroi ai.Në dekadën e fundit, sipas tij, është arritur rezultat i madh në siguri dhe në zhvillim gjithëpërfshirës të vendeve të Ballkanit perëndimor si dhe në realizimin e vizionit për një Evropë të bashkuar dhe të lirë.

 

“Shqipëria dhe Kroacia tani janë anëtare të NATO-së, ndërsa Maqedonia, Mali i Zi dhe Bosnja e Hercegovina presin që kjo të ndodhë”, deklaroi ministri Xhaferi, raporton agjencia INA.Ndërsa në emër të ministrit të mbrojtjes së Shqipërisë, Arben Imami, u paraqit zëvendësja e tij, Arta Musaraj e cila tha se Shqipëria dhe Kroacia janë anëtare të NATO-së por mbështesin edhe anëtarësimin e vendeve të tjera të rajonit në këtë organizatë të sigurisë.

 Në këtë konferencë, u paraqit edhe përfaqësuesi i SHBA-ve, ambasadori Pol Volers, i cili mes tjerash theksoi se kjo Konferencë që tashmë është quajtur A-5, me pjesëmarrjen edhe të dy vendeve tjera krahas Maqedonisë, Shqipërisë dhe Kroacisë që ishin fillimisht, flet vetvetiu që të rritet bashkëpunimi, koordinimi dhe aktivitetet ushtarake, për të arritur deri në cakun e fundit-anëtarësim në NATO.

Në konferencë, me një fjalë rasti të pranishmëve u janë drejtuar edhe përfaqësuesit e NATO-së të stacionuar në Shkup. Ndërsa ministri kosovar i Forcave të Sigurisë, Agim Çeku tha se FSK është e gatshme të ndihmoj paqen në rajon, aty ku ajo është e profesionalizuar.   
“Kur përmendet paqja, kjo nuk është vetëm një fjalë në letër, për paqen duhet të ngritët një themel i fortë i një bashkëpunimi rajonal dhe trans nacional”, tha Çeku duke shprehur optimizëm se Kosova në një të ardhme të afërt do të jetë anëtare me të drejta të plota në kuadër të “SHBA-Karta e Adriatikut”.                               

Duke përfunduar fjalën e tij, ministri Agim Çeku tha se Kosova sikurse edhe vendet anëtare të “Adriatiku 5”, kanë aspirata dhe qëllime të njëjta që të jetë mbështetës aktiv dhe kontribuuese për sigurinë Euro-Atlantike.