BE vendos: MSA për Kosovën, bisedime për Serbinë

Nëpërmjet rrjetit social Twitter, Herman Van Rompuy ka thënë se BE e ka miratuar vendimin për hapjen e bisedimeve me Serbinë dhe MSA-në për Kosovën

Liderët e Shteteve të Bashkimit Evropian edhe formalisht kanë miratuar të premten autorizimin për fillimin e negociatave për Marrëveshjen e Stabilizim-Asocimit me Kosovën si dhe kanë rekomanduar hapjen e bisedimeve me Serbinë për pranim në BE.

Ky vendim është marrë në Samitin e liderëve të Bashkimit Evropian, i cili u mbajt në Bruksel. Këtë vendim të Brukselit e ka shpallur presidenti i Këshillit të Evropës, Herman Van Rompuy.

Ai nëpërmjet rrjetit social Twitter ka thënë se Bashkimi Evropian e ka miratuar vendimin për hapjen e bisedimeve me Serbinë për pranim në Bashkimin Evropian. Sipas tij, pritet që bisedimet me Serbinë të fillojnë në muajin janar të vitit të ardhshëm.

Edhe komisioneri për zgjerim i BE-së, Shtefan Fule, ka shfrytëzuar rrjetin social për t’i uruar Kosovës për këtë vendim. “Pas vendimeve të Këshillit të Evropës: Urime Serbisë dhe Kosovës. Pres me padurim nisjen e negociatave”, ka shkruar Fule në Twitter, transmeton “Zeri.info”.

Këtë e ka konfirmuar edhe Ministri i jashtëm, Enver Hoxhaj, i cili ka thënë se është miratuar vendimi për nisjen e MSA-së me Kosovën. “Vendimi që autorizon hapjen e negociatave për MSA-në në mes të BE-së dhe Kosovës është miratuar”, ka shkruar Hoxhaj.

Ndryshe, rekomandimin që MSA t’i jepet Kosovës dhe data për fillimin e bisedimeve për anëtarësim për Serbinë, e kanë dhënë shefat e diplomacive të shteteve të BE-së, në një takim që kanë mbajtur të hënën.

Vendimi i Brukselit për Kosovën dhe Serbinë ka ardhur pa suksesit që dy shtetet kanë treguar në bisedimet për normalizimin e raporteve ndërshtetërore.