El Salvadori njeh Kosovën

Ndërkohë ditët në vazhdim pritet edhe vendosja e marrëdhënieve diplomatike

El Salvador, shtet i Amerikës latine ka njohur pavarësinë e Kosovës. “El Salvador tashme ka marrë vendim për ta njohur Kosovën shtet sovran dhe te pavarur. MPJ tashme ka marrë konfirmimin nga Ambasada e këtij shteti në OKB”.

Dy pjesëtarë të diplomacisë kosovare kanë marrë konfirmimin nga diplomacia e El Salvadorit që ky shtet e ka njohur pavarësinë e Kosovës. Bekim Sejdiu në New York dhe Ambasadori kosovar në Paris, Muhamedin Kullashi kanë pasur kontakte me trupin diplomatik të këtij shteti prej nga e kanë marrë lajmin për njohjen e Kosovës, mëson Indeksonline nga burimet e saj brenda Ministrisë së Jashtme të Kosovës.

Ndërkohë ditët në vazhdim pritet edhe vendosja e marrëdhënieve diplomatike.

Njohja formale sipas këtij burimi do të vijë të hënën, kur ky shtet pritet të dërgojë në Prishtinë edhe notën verbale.

Shteti i fundit që ka njohur Kosovën ishte Egjipti. Ministri Hoxhaj në këto dy vjet disa herë ka vizituar Amerikën Latine dhe ka takuar përfaqësues të këtyre shteteve.

Mbrëmë ministri Hoxhaj kishte paralajmëruar në “Twitter” një njohje të re. “Lajmi i fundit: Kosova evropiane pret sot një njohje të re nga një shtet i Hemisferës Perëndimore! Detajet se cili, do të jepen së shpejti”, pati shkruar Hoxhaj.