Në Maqedoni fillon faza përfundimtare e ndryshimeve kushtetuese  

Në Kuvendin e Maqedonisë sot fillon faza e tretë, apo ajo përfundimtare e ndryshimeve kushtetuese, sipas Marrëveshjes së Prespës për ndryshimin e emrit të Maqedonisë.

Në seancën e Kuvendit të Maqedonisë në rend dite janë katër pika: Verifikim i propozim- amendamenteve të Kushtetutës së Maqedonisë, miratimi i amendamenteve, shpallja e amendamenteve dhe miratimi i ligjit kushtetues për zbatim të amendamenteve. 

Që të miratohen këto ndryshime duhet të paktën dy të tretat e votave në Kuvend, ose 80 deputet të votojnë pro. 

Kryeministri i Maqedonisë, Zoran Zaev, ka thënë se është optimist se do të sigurojë 80 votat e nevojshme. Ai për këtë ka zhvilluar bisedime me dy liderët e  partive shqiptare opozitare, Aleanca për Shqiptarët dhe Lëvizja BESA. Ndërsa partia opozitare maqedonase VMRO-DMPNE ka njoftuar se nuk do të marrë pjesë në seancë, përcjell albinfo.ch

Kryeparlamentari Talat Xhaferi ka paralajmëruar se pret që debati për ndryshimet kushtetuese të përfundojë më herët se 15 janari, kur është edhe data e fundit për miratim.