“Fanfara Tirana” turne nëpër Evropë

Grupi karakteristik i instrumenteve frymore nga Shqipëria “Fanfara Tirana” prej 12 korrikut deri në nëntor do të bëjë xhiron e Europës nga Italia në Belgjikë, Poloni, Çeki, Hungari, Angli, Letoni…

Bëhet fjalë për një turne të gjatë koncertesh për grupin e famshëm shqiptar “Fanfara Tirana”, që ka bërë një “martesë” të lumtur me grupin etno-techno “Trans­global Underground” me qendër në Londër, transmeton Panorama.

Pas albumit të tyre të parë me titull “Albanian Wedding” (“Dasma shqiptare”), e pritur mjaft mirë nga adhuruesit e etno-folkut, në shkurt të këtij viti “Fanfara Tirana” nxori albumin “Kabatronics” në bashkëpunim me “Transglobal Underground” (TGU) të Londrës, i njohur për shkrirjen e stileve muzikore perëndimore, lindore e afrikane.

Albumi përmban 14 këngë, një gërshetim i “çuditshëm” mes Kabasë dhe Reggae-s, mes tunxheve dhe elektronikës, mes zërit të një prej këngëtarëve më të mirë shqiptarë Hysni Zela dhe zërit të zi të Tuup. E megjithatë, folklori shqiptar dhe ai ballkanik në përgjithësi përbën bazën e diskut.

Fatkeqësisht, këtij albumi nuk i është bërë ndonjë promocion në Tiranë, ndërkohë që mësohet se ka arritur në “top 5” në renditjen World Music Chart; ka marrë vlerësimin më të lartë (5 yjet) nga Manifesto në Itali e Mondomix në Francë; vlerësohet me katër yje nga “The Times”, “The Guardian”, “The Indipendent”, “Rumore”, “Rolling Stone”, e dhjetëra revista e gazeta mbi muzikën në mbarë botën, nga Kanadaja në Japoni, nga Kolumbia në Shtetet e Bashkuara të Amerikës.

Pjesë e suksesit të “Fanfara Tirana” është edhe Olsi Sulejmani, themeluesi i agjencisë muzikore Ballkan World Music Management, me qendër në Pesaro dhe Ferrara, menaxhon me dhjetëra artistë të mirënjohur të muzikës etnike, prodhon e organizon koncerte dhe festivale në gjithë Europën.

Duke filluar që nga data 12 korrik “Fanfara Tirana” dhe “Trans­global Underground” do të ndërmarrin një tur të gjatë koncertesh live, të cilat do të zgjasin nga dy orë.

 Përveç këngëve të albumit “Kabatronics”, në koncertet e quajtura “Fanfara Tirana meets Transglobal” do të interpretohen edhe këngë të vjetra të repertorit të grupeve, por të riorkestruara.

Turneu parashikon rreth dhjetë data në verë nëpër festivalet e mëdha europiane. E para më 12 korrik në Romë, në Villa Adda.

Në vjeshtë turneu do të vazhdojë në Skandinavi e vende të tjera të Europës Veriore.