Hollande, i brengosur me numrin e azilkërkuesve kosovarë

Presidenti Hollande ka shprehur brengosjen për numrin e madh të azilkërkuesve nga Kosova në Francë. Ai i ka thënë presidentes kosovare se kjo çështje po shkakton probleme dhe po i jep shtetit një imazh të shëmtuar

Sot, në Bërdo të Sllovenisë, presidentja e Republikës së Kosovës, Atifete Jahjaga u takua me presidentin e Republikës së Francës, zotëri Francois Hollande. Presidentja Jahjaga e falënderoi presidentin Hollande për mbështetjen që Republika e Francës i ka dhënë Kosovës që prej para, gjatë dhe pas luftës, në procesin e rindërtimit dhe të shtetndërtimit, si dhe në forcimin e konsolidimin e shtetësisë së Kosovës, bëhet e ditur në një njoftim të presidencës.

Presidentja Jahjaga tha se Kosova është një rrëfim suksesi i qytetarëve dhe institucioneve të saj, si dhe i bashkësisë ndërkombëtare dhe theksoi se konsolidimi ndërkombëtar i Kosovës gjithashtu po bëhet me ndihmën e miqve të saj, përfshirë edhe Francën. Ajo tha se është me rëndësi qëndrimi i vendeve anëtare të BE-së, posaçërisht i atyre që ende nuk e kanë njohur pavarësinë e Kosovës dhe lëvizja drejt pranimit të shtetit të Kosovës do të ndihmonte në avancimin e proceseve integruese të vendit, njofton Presidenca .

Presidenti i Republikës së Francës,  François Hollande, shprehu interesimin e tij për zhvillimet në Kosovë, për procesin e ndërtimit të shtetit të së drejtës, si dhe për proceset e integrimit në BE. Ai posaçërisht u interesua për zhvillimin ekonomik të Kosovës dhe kapacitetet e saj, si dhe ndihmën që Franca dhe BE-ja mund të japin në këtë drejtim. Presidenti Hollande po ashtu shprehu brengën për numrin në rritje të azilkërkuesve nga Kosova në Francë duke thënë se kjo çështje po shkakton probleme dhe po i jep shtetit një imazh të shëmtuar.