Shqiptari kërcen nga kati i tretë duke ikur nga policia

Me këtë rast i riu 28 vjeçar i dyshuar për tregti me drogë, ka pësuar lëndime të rënda, por ai tashmë ndodhet jashtë rrezikut për jetë

Një shqiptar i dyshuar për tregti me drogë, në përpjekje për të ikur nga policia ka rënë nga ballkoni i katit të tretë të një ndërtese banimi në Munih. Me këtë rast i riu 28 vjeçar ka pësuar lëndime të rënda, por, siç kanë bërë të ditur organet e ndjekjes të premten, ai tashmë ndodhet jashtë rrezikut për jetë.

Policia dhe doganierët kishin bllokuar hyrjen në banesën e një 37 vjeçari i cili në ato momentei ishte duke kryer biznese me narkotikë së bashku me 28 vjeçarin dhe me një burrë tjetër. Me atë rast shqiptari kishte provuar të ikte duke kërcyer nga ballkoni dhe ishte rrëzuar nga kati i tretë, shkruan focus.de.

Hetuesit me këtë rast kanë konfiskuar 800 gramë kokainë të pastër me vlere të tregut prej 200 mijë eurosh  si dhe para në vlerë prej 15 mijë eurosh. Ndaj tre të përfshirëve është ngritur padi penale.