Rriqrat marrin edhe një jetë njeriu

Viktima është një 34 vjeçar nga fshati Astrazub i komunës së Malishevës. Sipas infektologëve, ai ishte sjellë të dielën e kaluar në QKUK, por infektimi kishte qenë i shkallës së pashërueshme

Ka vdekur edhe një qytetarë nga pickimi i rriqrave të infektuara me virusin “krime kongo”, duke e çuar në shtatë numrin e njerëzve që kanë vdekur sivjet nga ethet hemorragjike. Viktima është një 34 vjeçar nga fshati Astrazub i komunës së Malishevës.

Viktima ka qenë duke u trajtuar në Qendrën Klinike Universitare të Kosovës në Prishtinë, por përkundër përpjekjes së infektologëve, ka qenë e pamundur të shpëtohet.  

Infektologu Salih Ahmeti ka deklaruar për mediet kosovare se më Klinikën Infektive janë duke u trajtuar edhe dy persona të tjerë të konfirmuar me virusin e etheve hemorragjike, kurse janë pranuar edhe tri raste të tjera të dyshimta.

Ahmeti ka thënë se i ndjeri në Klinikë ishte sjellë të dielën e kaluar dhe se është bërë gjithçka e mundur për t’ia shpëtuar jetën, por infektimi nga pickimi i rriqrave ka qenë i shkallës së pashëruar.

“Të shtrirë në të njëjtën klinikë janë edhe 6 persona të tjerë, derisa tek 2 prej tyre është konfirmuar prania e virusit në gjak”, tha ai. Gjatë këtij viti nga ethet hemorragjike në Kosovë kanë vdekur 7 persona.

Ndryshe, në bazë të një hulumtimi të bërë nga ekspertë të veterinarisë, del se rriqrat në komunën e Malishevës dhe Suharekës janë vektor i përhapjes se virusit të Etheve Hemorragjike Krime – Kongo.