Po çalon kthimi i kosovarëve nga kampet hungareze

Nga janari i këtij viti në Hungari, azil kanë kërkuar më se 5 mijë kosovarë, e që të gjithëve u është refuzuar kërkesa, ndërkaq atje mbesin edhe rreth 300 prej tyre

 Vetëm rreth 100 kosovarë që strehoheshin në kampet hungareze, nga disa qindra sa janë gjithsej, kanë mundur të kthehen ditë më parë në Kosovë. 110 të tjerë janë ktyher gjatë korrikut.

Ndërkaq, siç transmeton KTV, edhe shumë të tjerë vazhdojnë të qëndrojnë në qendrat e ndalimit në Hungari. Zëdhënësi i Ministrisë së Punëve të Jashtme, Artan Behrami, ka deklaruar se brenda këtij viti, pritet të kthehen edhe shumë të tjerë, por jo të gjithë. Sipas tij, kthimi i tyre po bëhet përmes IOM-it. Ai ka thënë gjithashtu se medializimi i çështjes së emigrantëve, ka bërë që të vetëdijesohen qytetarët për të mos migruar në vende të tjera.

Behrami ka thënë më tutje se ka rënë dukshëm numri i atyre që largohen nga Kosova. Ndërkohë, nga janari i këtij viti në Hungari, azil kanë kërkuar më se 5 mijë kosovarë, e që të  gjithëve u është refuzuar kërkesa, ndërkaq atje mbesin edhe rreth 300 prej tyre. Në Francë, ndërkaq, ilegalisht kanë shkuar më shumë se 2 mijë qytetarë të Kosovës, përfundon KTV.