Azilkërkuesit kundërshtojnë strehimin në bunker

Strehimorja e ofruar është “një gropë e padenjë për njeriun”, thuhet në një shkresë që kanë përpiluar azilkërkuesit.

Dhjetë azilkërkues po kampojnë nga e premtja e javës së kaluar në arealin para Stacionit Hekurudhor të Solothurnit. Ata po e bëjnë këtë veprim shenjë kundërshtimi ndaj vendimit për t`i strehuar në një strehimore nëntokësore (bunker) të mbrojtjes civile. Sot e hënë, autoritetet e kantonit kanë provuar të bisedojnë me këtë grup protestuesesh por ende nuk shihet ndonjë zgjidhje në këtë drejtim.

Strehimorja është “një gropë e padenjë për njeriun”, thuhet në një shkresë që kanë përpiluar azilkërkuesit. Në atë hapësirë nëntokësore nuk depërton drita e diellit dhe ajrosja është e pamjaftueshme.

Claudia Hänzli, shefe e Entit Kantonal për siguri sociale (ASO) ka thënë të hënën për mediet zvicerane se autoritetet janë në bisedime me grupin, shkruan nzz.ch. Sipas saj, do të shfrytëzohen hapësira e veprimit brenda mundësive që ofron ligji, për të zgjidhur problemin.

“Por ne duam të shmangim një konflikt të hapur dhe të gjejmë një zgjidhje të qetë”, ka thënë ajo.

Ndërkaq azilkërkuesit protestues kërcënojnë se, në rast të mosplotësimit të kërkesës për strehim më të mirë, do të mund të hidhen edhe në grevë urie, thuhet në një njoftim të botuar në “Solothurner Zeitung”.