Ikni kolonave, shfrytëzoni vendkalimet tjera kufitare

Policia e Kosovës iu rekomandon mërgimtarëve që të kalojnë edhe në pikëkalimet kufitare në Mutivodë dhe Muqibabë për t’i ikur kolonave të gjata në Merdarë dhe te Dheu i Bardhë

Policia e Kosovës iu rekomandon qytetarëve kosovarë, por në veçanti bashkatdhetarëve që kalojnë nëpër Serbi për të shkuar në vendet e BE-së, që t’i shfrytëzojnë edhe dy pikëkalimet tjera kufitare Mutivodë dhe Muqibabë, me qëllim që t’i ikin kolonave të gjata.

“Me qëllim të informimit të qytetarëve dhe gjithë opinionit të gjerë, ju informojmë se në pikë-kalimin kufitar Merdare dhe Dheu i Bardhë, qarkullimi i automjeteve është duke u zhvilluar me një intensitet të shtuar në të dy drejtimet”, njofton Policia nëpërmjet një kumtese.

Sipas Departamentit të Policisë Kufitare, në pikë-kalimin Merdare dhe Dheu i Bardhë, kohë pas kohe po fillon të ketë kolona dhe pritje të gjata për në dalje nga Kosov në drejtim të Serbisë, prandaj PK rekomandon që të shfrytëzohen edhe pikëkalimet tjera.

“Polica e Kosovës me qëllim të shmangies nga pritjet e gjata dhe me qëllim të krijimit të lehtësirave për qytetarët e në këtë rast mërgatën kosovare, i njofton të njëjtit së përpos këtyre dy pikave kufitare mund t’i përdorin për qarkullim edhe dy pikë-kalime tjera kufitare, Mutivodë dhe Muqibabë”, thuhet në deklaratë.

Procedurat e kalimit në këto pikat tjera, duke përfshirë posedimin e dokumentacioneve të aplikueshme për kalimin kufitar, sipas Policisë, janë krejtësisht të njëjta sikurse në pikë-kalimet kufitare në Merdare dhe Dheu i Bardhë.