Qeveria gjermane, mbështetëse e reformës në drejtësi

Foto ilustrim

Kryetari i Këshillit të Lartë të Prokurorisë, Gent Ibrahimi, priti sot në takim ambasadoren e Gjermanisë në Tiranë, Susanne Schütz, me të cilën bisedoi rreth vazhdimit të mbështetjes dhe bashkëpunimit të qeverisë gjermane për institucionet e reja të drejtësisë në Shqipërinë, për ecurinë e procesit të ngritjes së strukturës të KLP-së dhe situatën e aplikimeve për t’u bërë pjesë e SPAK, e cila ka si afat për dorëzimin e dokumentacionit dri më 7 shkurt 2019.

Nga ana e saj, ambasadorja Schütz vlerësoi punën e deritanishme e KLP dhe nënvizoi edhe një herë mbështetjen e qeverisë gjermane për zbatimin e reformës në drejtësi në vendin tonë, shkruan ATSH, përcjell albinfo.ch.

Schütz u interesua për objektivat e KLP-së dhe për hapat e nevojshëm për arritjen e tyre. Interes të veçantë ka ngritja e SPAK dhe zgjedhja e Prokurorit të Përgjithshëm, si dy teste të rëndësishme për organet e reja të drejtësisë.

Kryetari i KLP-së, Gent Ibrahimi ,siguroi ambasadoren Schütz për përkushtimin maksimal të strukturës që ai drejton në përmbushjen e detyrimeve ligjore dhe administrative brenda afateve kushtetuese. 

Transparenca dhe profesionalizmi i KLP-së do të jenë themeli i veprimtarisë së këtij këshilli, i cili premton të rikthejë besimin e shoqërisë te drejtësia.