Skip to content

Zvicra mbështet Shqipërinë me statistika më të sakta dhe mjete të reja digjitale

Marrëveshja me INSTAT-in synon përmirësimin e të dhënave për bashkitë dhe rajonet, për të ndihmuar planifikimin dhe shërbimet publike.

INSTAT-i dhe partnerët zviceranë kanë nënshkruar një marrëveshje të re për përmirësimin e statistikave rajonale dhe bashkiake në Shqipëri, përcjell albinfo.ch.

Marrëveshja u nënshkrua më 19 nëntor nga drejtoresha e INSTAT-it, Lantona Sado, ambasadorja e Zvicrës në Shqipëri, Siri Walt, dhe ambasadori Benjamin Rothen, përfaqësues i Zyrës Federale Zvicerane të Statistikës.

Ambasadorja Walt theksoi se statistikat e besueshme janë të nevojshme për qeverisje të mirë dhe për përparimin e Shqipërisë drejt anëtarësimit në Bashkimin Evropian.

Pas nënshkrimit u zhvillua aktiviteti “Nga të dhënat te vendimet: Mjetet digjitale të INSTAT-it”, ku u prezantuan platforma që lehtësojnë përdorimin e statistikave në hartimin e politikave dhe planifikimin vendor.

Mes tyre ishin Paneli i Bashkive, WebGIS, Qendra e Gjeodatave dhe Regjistri Statistikor i Ndërtesave dhe Banesave të Shqipërisë. Ky regjistër lidh informacionin për ndërtesat, banesat dhe popullsinë me vendndodhjen gjeografike.

Lantona Sado nënvizoi se vendimmarrja vendore kërkon të dhëna të përditësuara dhe të besueshme, që pasqyrojnë nevojat e secilit rajon.

Bashkëpunimi mbështetet edhe në projektin SALSTAT, i cili që nga viti 2018 ka ndihmuar zhvillimin e statistikave vendore dhe rajonale me mbështetjen e Agjencisë Zvicerane për Zhvillim dhe Bashkëpunim./Albinfo.ch