Kanë kontrabanduar imigrantë, dënohen me 10 vjet burg

Gjykata Themelore e Prizrenit e dënoi shtetasin turk Okay Altuntas me shtatë vjet burgim dhe Bujar Fazliun me tre vjet burg

Trupi gjykues i përbërë prej gjyqtarëve të EULEX-it dhe gjyqtarëve vendas në Gjykatën Themelore në Prizren, ka shpallur aktgjykimin për rastin e kontrabandës me imigrantë me të cilin dy nga tre të pandehurit u dënuan me dhjetë vjet burgim.

Gjykata e shpalli fajtor shtetasin turk Okay Altuntas për njërën pikë të aktakuzës – kontrabandë me imigrantë dhe e dënoi atë me shtatë vjet burgim.

Altuntas u lirua nga akuzat për krim të organizuar, pastrim të parave si dhe nga një pikë shtesë për kontrabandë me imigrantë, shkruan koha.net. 

Ndërkaq Bujar Fazliu u shpall fajtor për njërën pikë të aktakuzës për kontrabandë me imigrantë dhe u dënua me tre vjet burgim. Fazliu u lirua nga akuzat për krim të organizuar, pastrim të parave dhe nga akuza e dytë për kontrabandë me imigrantë. I pandehuri i tretë në këtë rast, Florent Ademaj, u lirua nga të gjitha akuzat.

Rasti ishte ndjekur penalisht nga një prokuror i EULEX-it i Prokurorisë Speciale të Kosovës (PSRK). Pas shpalljes së aktgjykimit Alister Cumming, prokurori i EULEX-it nga Prokuroria Speciale e Kosovës, i cili e ka ndjekur penalisht këtë rast, tha: “Megjithëse ne jemi të zhgënjyer me disa aspekte të caktuara të vendimit të trupit gjykues, ne e mirëpresim dënimin e dy nga të pandehurit lidhur me akuzat për kontrabandë me emigrantë.

Mirëpo, ky rast ende nuk ka përfunduar. Njëri i pandehur pritet të gjykohet në tetor, kurse një numër tjetër i të pandehurve aktualisht ndodhen në paraburgim. Policia e Kosovës dhe Policia e EULEX-it kanë punuar bashkë dhe shumë në këtë rast në bashkëpunim me organizata tjera policore nëpër Evropë”.